برهان وبركان والمونديال اللى كان

بعد انتهاء مولد سيدى كاس العالم بجنوب افريقيا ، والاحتفالات العالمية بأسبانيا ، والنجاح الكبير لدولة جنوب افريقيا فى تنظيم هذا الحدث الاستثنائى، فوجىء السيد برهان وعبده بركان بالكابتن مونديال يمر عليهما بالمقهى فرحبا به أروع ترحيب وجلس الكابتن مونديال مع السيد برهان والتحق بهما عبده بركان بعدما طلب الشاى للكابتن مونديال.

عبده بركان: كابتن مونديال... احنا زعلانين منك فى مصر .... بصراحة انت عندك مشكلة معانا

كابتن مونديال: ليه يا عبده؟ ربنا ما يجيبش مشاكل .. خير؟

عبده بركان: دايما تقلان علينا ومش عايزنا نجيلك ومالناش حظ معاك وغالبا ما بتقبل فرق أقل بكتير من مصر... وتيجى عندنا وتقف.

كابتن مونديال: مش يمكن علشان انتم الدولة الوحيدة اللى قالت "احنا مش حانروح لكاس العالم ، كاس العالم هو اللى حاييجى لغاية عندنا ، و بتاكسى كمان !!!.

السيد برهان: طيب والحل يا كابتن مونديال؟

كابتن مونديال: اول حاجة تبطلوا تهريج وقت الجد ، و تدركوا واقعكم كويس وتفهموه وبعدين تخلصوا النية وتشتغلوا... ده طبعا بعد ما تتعلموا من أخطاءكم الكتيرة والمتكررة بطريقة غريبة جدا زى ماتكون هى القاعدة ، والانجاز هو الاستثناء

عبده بركان:أنا مانكرش ان احنا عندنا مشاكل زى ماغيرنا عنده مشاكل... يعنى مش احنا بس اللى عندنا غلطات ومشاكل.

كابتن مونديال: غلط يابركان... أولا مصر المفروض ماتتقارنش بغيرها لان مصر مش زى غيرها... ثانيا وليه ماعندكوش الانجازات اللى عند غيركم برضه؟... ثالثا، انتم ماعندكوش أخطاء.. انتم عندكم خطايا.. والمشكلة انكم تمتازوا بميزتين... الاولى: انكم عمركم ما بتتعلموا من أخطاءكم....والثانية: انكم دايما بتتعاملوا مع كل المواقف وكأنها مفاجآت مش مستعدين لها.

السيد برهان: والله معاك حق يامونديال... ياما قلت كده وماحدش عايز يسمع ، ولو سمع مش عايز يفهم ، ولو فهم.... مش عايز يعمل حاجة.... لكن واضح ان حضرتك متابع مصر كويس.

كابتن مونديال: المشكلة الكبيرة فى مصر دلوقتى ان ولادها مش فهمين قيمتها زى اللى شايفينها من بره ، وده اللى مخليهم يتعاملوا مع اللى بيحصل باستهانة وده اللى خلى دول نكرة و تاريخهم أكبر مثال للصفر وحاضرهم خير مثال للسالب ومستقبلهم ليس له معالم يتجرأوا على مصر ويتخطوا حدود الادب وانتم بتعملوا لهم احتفالات واستقبالات تخليهم يتجرأوا أكثر فى المستقبل.

عبده بركان: ايه يا عم مونديال انت جاى تشعللها بعد ما هدينا، لامالاكش حق فى دى، وبعدين ماتزعلش منى انتم كمان فى كاس العالم ماكنتوش قد كده يعنى... والفيفا بتاعتك فيها فساد... يعنى لا تعايرنى ولا أعايرك الفساد طايلنى وطايلك...

كابتن مونديال: بالنسبة لكاس العالم على مستوى التتنظيم كان على أعلى مستوى وكل أهدافه اتحققت والفيفا كسبت وجنوب افريقيا كسبت .. بالذمة مش مكسوف تتكلم عن كاس العالم وانتم ملفكم الوحيد اللى خد صفر وماحدش اتحاسب وماحدش اتعلم ... بالنسبة للمستوى الفنى انتم رافضين تشوفوا الجديد اللى فيه ، تعرف يابركان كم طريقة لعب جديدة شوفناها فى كاس العالم؟

عبده بركان: بصراحة.......

السيد برهان مقاطعا ومنقذا بركان من المأذق الذى لا يستطيع الخروج منه : طبعا شوفنا كرة شاملة جديدة من اسبانيا وتاثيرات هولندية من اول كرويف وفان جال وريكارد انطبعت على برشلونه و تجلت فى منتخب اسبانيا وشوفنا الكرة الواقعية لهولندا وشوفنا تغييرات فى 4-4-2 مثل 3-3-4 و 4-1-4-1 و 4-2-3-1 بتكتيكات جديدة وتغييرات هجومية ودفاعية وفكر مختلف

كابتن مونديال: برافو يابرهان... كام واحد كتب فى الموضوع ده فى مصر؟

السيد برهان: مش متذكر... لكن بصراحة كان كل تركيز الاعلام على سلبيات كاس العالم

كابتن مونديال: المضحك المبكى انكم ماشوفتوش غير سلبيات غيركم ومش راضيين تشوفوا سلبياتكم

عبده بركان: ياعم مونديال.. انت محسسنى انكم ملايكة واحنا شياطين... ايه؟ ما بتغلطوش؟ ماعندكوش مشاكل؟

كابتن مونديال: اكيد عندنا مشاكل... التحكيم مثلا كان أسوأ تحكيم فى تاريخ كاس العالم من البداية وحتى النهاية ... وده اللى مخلينا نفكر فى حاجات كتيرة لتطوير كرة القدم... مش عيب ان أى حد يكون عنده مشكلة ، لكن العيب انه ينكرها لانه طول مابينكرها عمره ما حيتعلم ولا حيتطور

السيد برهان: بمناسبة التطوير ، ايه توقعاتك بالنسبة للتطوير اللى حايحصل فى عالم الكرة؟

كابتن مونديال: اولا حيتم مراجعة ملف التحكيم من أوله الى آخره وأكيد حيتم الاستعانة بالتكنولوجيا فى التحكيم

عبده بركان: امتى ياكابتن؟

كابتن مونديال: قبل كاس العالم بالبرازيل 2014 ويمكن يتجرب فى كاس العالم للقارات 2013

السيد برهان: بمناسبة التحكيم ، ايه رايك فى التحكيم المصرى؟

كابتن مونديال: لوحللنا أخطاء التحكيم المصرى فى الدورى و أخطاء كاس العالم ، حتلاقوا كاس العالم أخطاءه أكتر لكن التعصب اللى عندكم مش مخليكم شايفين ده... خلوا الحكام فى مصر يحسوا بالتقدير واحترموهم فى وسائل الاعلام وساندوهم و حتشوفوا الفرق..

عبده بركان: انت متابع أخبار اتحاد الكرة فى مصر؟

كابتن مونديال: هو فيه اتحاد كرة فى مصر؟

عبده بركان: طبعا واضح انك مش متابع

كابتن مونديال: أتابع اتحاد متحول للنيابة؟ ولا انتخاب رئيس باطل بحكم محكمة؟ ولا خناقات الاعضاء على منصب نائب الرئيس؟ ولا اعادة رئيس لجنة الحكام المستقيل؟ ولا دورى حيبدأ يوم 6 أغسطس و لسه جدوله مااتحطش؟ ولا أزمة البث اللى بتتكرر كل سنة والكل قاعد دلوقتى فى الخباثة وبيسن السكينة علشان يصعدها ويستفيد؟ ولا أزمة جدو؟ ولا أزمة ريعو؟ ولا أزمة المادة 18؟ ولا... ولا...؟

أصيب عبده بركان باحباط ، فقرر الانسحاب بأدب بعد شعوره بالهزيمة أمام كابتن مونديال الذى يأمل فقط فى ان يستوعب بركان حجم المشاكل اللى واقعة فيها الكرة المصرية... ولكن السيد برهان لم يخيب أمل كابتن مونديال وأكمل معه الحديث ...

السيد برهان: وانت ايه انطباعك عن احتلال مصر المركز التاسع فى تصنيف الفيفا؟

كابتن مونديال: طبعا ده دليل على أن مستوى الكرة فى مصر ليس بالقليل ولكن للاسف معظم من له علاقة بكرة القدم فى مصر لا يعمل الا لنفسه ومصالحه الشخصية... مع العلم ان انتم البلد الوحيدة اللى كل واحد بيشتغل فى الكرة بيقبض ملايين وبعدين يطلع فى أجهزة الاعلام يسمعنا محاضرات عن تضحياته... عمرك سمعت حد فى دولة تانية بيشتغل شغلانة- أى شغلانة - يكسب منها ملايين ويطلع يقول أنا بضحى؟

السيد برهان: لو اللى بيقبض ملايين بيضحى ، أمال احنا اللى بندفع من قوتنا وقوت أولادنا... نبقى ايه؟

كابتن مونديال: ضحايا والله ، ضحايا لكل اللى احنا كنا بنتكلم عنه من أول الوسط الرياضى لغاية الوسط الاعلامى مرورا بوسط البلد والمرور فى وسط البلد... اسيبك بقى دلوقتى ونكمل بعدين

السيد برهان: رايح على فين؟

كابتن مونديال: اتفرج على أحلى مسرحية كوميدية بتتعرض فى مصر دلوقتى

السيد برهان: فين؟

كابتن مونديال: فى الاسماعيلية....

السيد برهان: مسرحية ايه يا ابو الكباتن؟

كابتن مونديال: "شبيبة وحبيبة والحفلة المريبة"